ମୋଦିଙ୍କ ବିରୋଧରେ ବିରୋଧୀ କଣ ସତରେ ଏକଜୁଟ ହେଉଛନ୍ତି ?

(ସତ୍ଯପାଠ ବ୍ୟୁରୋ) ଭୁବନେଶ୍ୱର : କେତେବେଳେ ଟ୍ରାକ୍ଟର, କେତେବେଳେ ସାଇକେଲ, କେବେ ବ୍ରେକଫାଷ୍ଟ ତ ପୁଣି କେତେବେଳେ ଚା ପଲିଟିକ୍ସ । ଗତ କିଛିଦିନ ହେବ ଜାତୀୟ ରାଜନୀତିର ସମୀକରଣ ପରିବର୍ତ୍ତନ ହେଉଥିବାର ନଜର ଆସୁଛି। ପୂର୍ବ ଅପେକ୍ଷା କଂଗ୍ରେସ ନେତା ରାହୁଲ ଗାନ୍ଧୀ  ଏବେ ରାଜନୀତିରେ ଅପେକ୍ଷାକୃତ ଅଧିକ ସକ୍ରିୟ ଥିବା ଦେଖାଦେଉଛି। ମଙ୍ଗଳବାର ଦିନ ସେ ବ୍ରେକଫାଷ୍ଟରେ ସେ ବିରୋଧୀ ଦଳର ସାଂସଦମାନଙ୍କ ସହ ଜାତୀୟ ପ୍ରସଙ୍ଗ ଉପରେ ଆଲୋଚନା କରିଥିଲେ। ଏହାପରେ ତୈଳଦର ବୃଦ୍ଧି, ଅତ୍ୟାବଶ୍ୟକ ସାମଗ୍ରୀର ଦରବୃଦ୍ଧିକୁ ବିରୋଧ କରି ବିରୋଧୀ ସାଂସଦଙ୍କ ସହ ସାଇକେଲ ଯୋଗେ ସଂସଦ ଆସିଥିଲେ। ବିରୋଧୀଙ୍କ ସହ ବ୍ରେକଫାଷ୍ଟ ସମୟର ଏକ ଫଟୋ ପୋଷ୍ଟ କରି କ୍ୟାପସନରେ ଲେଖିଥିଲେ , “ଆମ ଦେଶ, ଆମ ଲୋକ, ଆମର ପ୍ରାଥମିକତା। ଭାରତକୁ ଆଗରେ ରଖିବା ପାଇଁ କଂଗ୍ରେସ ଦଳ ଏବଂ ବିରୋଧୀ ଏକଜୁଟ ହୋଇଛନ୍ତି।”

 ଏହାର କିଛି ସମୟ ପରେ ଦରବୃଦ୍ଧି ବିରୋଧରେ ସାଇକେଲ ଚଳାଇ ସଂସଦ ଆସୁଥିବାର ଏକ ଫଟୋ ପୋଷ୍ଟ କରିଥିଲେ। ସେଥିରେ ଲେଖିଥିଲେ, ” ନା ଆମର ଚେହେରାର ଆବଶ୍ୟକତା ଅଛି ନା ଆମର ନାଁର ଆବଶ୍ୟକତା ରହିଛି। ଗୁରୁତ୍ୱପୂର୍ଣ୍ଣ କଥା ହେଉଛି ଆମେ ଜଣେ ଜଣେ ଜନ ପ୍ରତିନିଧୀ। ପ୍ରତ୍ୟେକଙ୍କ ମୁହଁରେ ଦେଶର ସେହି କୋଟି କୋଟି ଜନତାଙ୍କ ଚେହେରା ଯେଉଁମାନେ ଦରବୃଦ୍ଧି ଯୋଗୁଁ ଅସୁବିଧାର  ସମ୍ମୁଖୀନ ହେଉଛନ୍ତି । ଏ ହେଉଛି ଆଚ୍ଛେଦିନ୍ ? “

ରାହୁଲ ଗାନ୍ଧୀଙ୍କ ଏହି ଦୁଇଟି ଟ୍ବିଟ୍ ର ଦୁଇଟି ମେସେଜ୍ ରହିଛି, ଗୋଟିଏ ହେଉଛି ବିରୋଧୀ ଏକଜୁଟ ଅଛନ୍ତି, ଅନ୍ୟଟି ହେଉଛି ନା ଚେହେରା ନା ନାଁ କାହାର ବି ଆବଶ୍ୟକତା ନାହିଁ। ଆଗାମୀ ଲୋକସଭା ନିର୍ବାଚନ ପାଇଁ ଆହୁରି ତିନି ବର୍ଷ ସମୟ ଅଛି। ଏବେ ଠାରୁ ରାଜନୈତିକ ମହଲରେ ଚର୍ଚ୍ଚା ଜୋର ଧରିଛି ଯେ ୨୦୨୪ ରେ ମୋଦୀ ସରକାରଙ୍କୁ ହଟାଇବା ପାଇଁ ତିନି ବର୍ଷ ପୂର୍ବରୁ ବିରୋଧୀ ପ୍ରୟାସ ଆରମ୍ଭ କରି ଦେଇଛନ୍ତି। 

  କିନ୍ତୁ ଏଠାରେ ପ୍ରଶ୍ନ ଉଠୁଛି ଯେ କଣ  ବିରୋଧୀଙ୍କ ସହ  ଚା ପିଇବା, ବ୍ରେକଫାଷ୍ଟ କରିବା , ଫଟୋ ଉଠାଇବା ଏବଂ ସାଇକେଲରେ ସଂସଦ ଯିବା ଦ୍ବାରା ବିରୋଧୀ ଏକଜୁଟତା ସଫଳ ହୋଇଯିବ ?

 ନେତୃତ୍ୱ କାହାର ?

ବରିଷ୍ଠ ସାମ୍ବାଦିକ ନୀରଜ ଚୌଧୁରୀ କୁହନ୍ତି, “ଏକାଠି ଜଳଖିଆ ଖାଇବା, ସାଇକେଲ ଚଲାଇବା ଏକ ନୂତନ ଟ୍ରେଣ୍ଡ। କିନ୍ତୁ ବିରୋଧୀଙ୍କୁ ‘ଏକଜୁଟ’ କରିବା ବହୁତ କଷ୍ଟ । ସବୁଠାରୁ ଗୁରୁତ୍ୱପୂର୍ଣ୍ଣ ପ୍ରଶ୍ନ ହେଉଛି ନେତୃତ୍ୱ କିଏ ନେବ ? ସେହି ଚେହେରା ହେବ କିଏ ? ରାହୁଲ ସେହି ଚେହେରା ହେବେ କି? ଏବଂ ରାହୁଲଙ୍କ ନେତୃତ୍ୱକୁ ଆଞ୍ଚଳିକ ଦଳ ମାନେ ଗ୍ରହଣ କରିବେ କି? “

 ନିକଟରେ ମମତା ବାନାର୍ଜୀ ମଧ୍ୟ ଦିଲ୍ଲୀ ଗସ୍ତରେ ଆସିଥିଲେ।  ସେ କଂଗ୍ରେସ ନେତା ରାହୁଲ ଗାନ୍ଧୀ ଏବଂ ସଭାପତି ସୋନିଆ ଗାନ୍ଧୀଙ୍କୁ ମଧ୍ୟ ଭେଟିଥିଲେ। ତେବେ ଏହି ଭେଟଘାଟ ପରେ ତାଙ୍କୁ ପ୍ରଶ୍ନ କରାଯାଇଥିଲା ଯେ ସେ କଣ ବିରୋଧୀ ଏକଜୁଟତାର ନେତୃତ୍ୱ ନେବେ। କିନ୍ତୁ, ମମତା ବାନାର୍ଜୀ ଏହାର ସିଧାସଳଖ ଜବାବ ଦେଇ ନଥିଲେ। 

 ଅନ୍ୟ ପକ୍ଷରେ ବିରୋଧୀ ଦଳଗୁଡ଼ିକୁ ଏକାଠି କରିବା ପାଇଁ ଶରଦ ପାୱାର ମଧ୍ୟ ଉଦ୍ୟମ କରୁଥିବାର ଦେଖିବାକୁ ମିଳୁଛି। କିଛିଦିନ ପୂର୍ବେ ତାଙ୍କ ଘରେ ମଧ୍ୟ ଏକ ବୈଠକ ଅନୁଷ୍ଠିତ ହୋଇଥିଲା, ସେଠାରେ ମଧ୍ୟ ଅନେକ ନେତା ଏକାଠି ହୋଇଥିଲେ। 

ଏପଟେ ହରିୟାଣାର ମୁଖ୍ୟମନ୍ତ୍ରୀ ଓମ୍ ପ୍ରକାଶ ଚୌଟାଲା ମଧ୍ୟ ତୃତୀୟ ସାମ୍ମୁଖ୍ୟର ଆଭାସ ଦେଇଛନ୍ତି। ନିକଟରେ ସେ ନୀତୀଶ କୁମାରଙ୍କୁ ଭେଟିଥିଲେ, ଯାହାକୁ ନେଇ ରାଜନୈତିକ ମହଲରେ ଚର୍ଚ୍ଚା ଆରମ୍ଭ ହୋଇଥିଲା। ରାହୁଲ ଗାନ୍ଧୀ ମଧ୍ୟ ୧୬ ବିରୋଧୀ ଦଳକୁ ଜଳଖିଆ ପାଇଁ ନିମନ୍ତ୍ରଣ ପଠାଇଥିଲେ, କିନ୍ତୁ ବାହୁଜନ ସମାଜ ପାର୍ଟି ଏବଂ ଆମ୍ ଆଦମୀ ପାର୍ଟିକୁ ବାଦ୍ ଦେଲେ ଅନ୍ୟ ବିରୋଧୀ ଦଳ ଗୁଡ଼ିକ ଏହି ବୈଠକରେ ସାମିଲ ହୋଇଥିଲେ। 

ବରିଷ୍ଠ ସାମ୍ବାଦିକ ନୀରଜା କୁହନ୍ତି, ” ୨୦୨୪ ନିର୍ବାଚନ ପୂର୍ବରୁ ସବୁ ବିରୋଧୀଙ୍କୁ ଏକାଠି କରିବା କଷ୍ଟସାଧ୍ୟ ମନେହୁଏ। କିଛି ଦଳ ନିଜକୁ ନିରପେକ୍ଷ ବୋଲି କହିବାକୁ ପସନ୍ଦ କରନ୍ତି। ଯେମିତିକି ନବୀନ ପଟ୍ଟନାୟକଙ୍କ ବିଜେଡି , ଜଗନ୍ ମୋହନ ରେଡ୍ଡୀଙ୍କ ୟାଏସ୍ଆର କଂଗ୍ରେସ ଏବଂ ଟିଆରଏସ ମୁଖ୍ୟ କେସିଆର। ଏହି କାରଣ ହିଁ ବିରୋଧୀ ଏକଜୁଟତାକୁ ନେଇ ପ୍ରଶ୍ନବାଚୀ ସୃଷ୍ଟି କରେ। ଠିକ୍ ଏହି ପ୍ରସଙ୍ଗରେ ବିଜେପି ମଧ୍ୟ ବିରୋଧୀଙ୍କୁ ଆକ୍ରମଣ କରୁଥାଏ ।

  ଏକ ଘରୋଇ ଟିଭି ଚ୍ୟାନେଲରେ ବିତର୍କ ସମୟରେ ଶିବସେନା ସାଂସଦ ପ୍ରିୟଙ୍କା ଚତୁର୍ବେଦୀ କହିଛନ୍ତି ଯେ ଭାରତ ଭଳି ଗଣତନ୍ତ୍ରରେ ଚେହେରାର ଆବଶ୍ୟକତା ନାହିଁ, ଏଠାରେ ପ୍ରସଙ୍ଗ ମୂଳ ମୁଦ୍ଦା। ତେବେ ରାହୁଲଙ୍କ ନେତୃତ୍ୱ ଶିବସେନା ଗ୍ରହଣ କରିବେ କି ନାହିଁ ସେ ପ୍ରଶ୍ନର ସିଧାସଳଖ ଉତ୍ତର ସେ ଦେଇ ନାହାଁନ୍ତି।

ପ୍ରସଙ୍ଗ ଉପରେ ଏକଜୁଟତା ?

ରାହୁଲ ଗାନ୍ଧୀଙ୍କ ବ୍ରେକଫାଷ୍ଟର ଗୋଟିଏ ଦିନ ପରେ ସଂସଦ ପରିସରରେ କଂଗ୍ରେସ ସାଂସଦ ରବନୀତ ବିଟୁ ଏବଂ ଅକାଳୀ ଦଳ ସାଂସଦ ହର୍ଷମ୍ରତ କୌର ବାଦଲ ପରସ୍ପର ସହ ଯୁକ୍ତିତର୍କ କରୁଥିବା ଦେଖିବାକୁ ମିଳିଥିଲା। ପ୍ରସଙ୍ଗ ଥିଲା ହେଲା ନୂତନ କୃଷି ଆଇନ। ଉଭୟଙ୍କ ମଧ୍ୟରେ ଯୁକ୍ତିତର୍କର ଭିଡିଓ ସୋସିଆଲ ମିଡିଆରେ ବହୁତ ଭାଇରାଲ ହେଉଛି। 

 ବରିଷ୍ଠ ସାମ୍ବାଦିକ ଅରବିନ୍ଦ ମୋହନ କୁହନ୍ତି, “ଅଧିକାଂଶ ବିରୋଧୀ ଦଳ କୃଷି ବିଲ୍ ଉପରେ କେନ୍ଦ୍ର ସରକାରଙ୍କୁ ବିରୋଧ କରୁଛନ୍ତି। ସେମାନେ ମଧ୍ୟ ଏହି ପ୍ରସଙ୍ଗରେ ବିରୋଧ କରୁଛନ୍ତି। କିନ୍ତୁ କୌଣସି ବିରୋଧୀ ଖୋଲାଖୋଲି ଭାବେ କହି ନାହାଁନ୍ତି ଯେ ଯଦି ସେମାନେ କ୍ଷମତାକୁ ଆସନ୍ତି, ତେବେ ନୂତନ କୃଷି ଆଇନକୁ ନେଇ ଆମେ କଣ କରିବୁ ? ଆମେ ସେହି ଆଇନକୁ ରଦ୍ଦ କରିବୁ ନା ପରିବର୍ତ୍ତନ କରିବୁ ନା MSP ଉପରେ ଏକ ଆଇନ ଆଣିବୁ ? ”  ଅରବିନ୍ଦ ମୋହନ ବିଶ୍ୱାସ କରନ୍ତି ଯେ ବିରୋଧୀ ନିଶ୍ଚିତ ଭାବରେ ପୂର୍ବ ଅପେକ୍ଷା ଅଧିକ ଏକଜୁଟ ଦେଖାଯାଉଛନ୍ତି, କିନ୍ତୁ ଏହା ବାସ୍ତବ ରୂପ ନେବ ଏହା କହିବା କଷ୍ଟକର। କେବଳ ମୋଦୀଙ୍କୁ ହଟାଇବା ନାରା କାମ କରିବ ନାହିଁ।  ବିରୋଧୀଙ୍କୁ ଠୋସ୍ ପ୍ରସଙ୍ଗ ଏବଂ ସେମାନଙ୍କ ଉପରେ ଏକ ସ୍ପଷ୍ଟ ଆଭିମୁଖ୍ୟ ନେବାର ଆବଶ୍ୟକତା ରହିଛି ।

ସେ କହିଛନ୍ତି “ୟୁପିଏ ଶାସନ ତୁଳନାରେ ବିଜେପି ଶାସନରେ ଦର ନିଶ୍ଚିତ ଭାବେ ବୃଦ୍ଧି ପାଇଛି। ସରକାର ଏଥିରୁ ମଧ୍ୟ ବହୁତ କିଛି ରୋଜଗାର କରିଛନ୍ତି। କିନ୍ତୁ ଏହା ଉପରେ ବିରୋଧୀ ଦଳର ସ୍ପଷ୍ଟ ଆଭିମୁଖ୍ୟ କ’ଣ ହେବ ? ଦଳମାନେ ଏହା ସ୍ପଷ୍ଟ କରୁ ନାହାନ୍ତି । “

  ବିଧାନସଭା ନିର୍ବାଚନରେ ​​କ’ଣ ହେବ ?

 ଯଦିଓ ରାହୁଲ ଗାନ୍ଧୀଙ୍କ ଜଳଖିଆ ପାର୍ଟୀରେ ଅକାଳୀ ଦଳର ନେତାଙ୍କୁ ଦେଖାଯାଇ ନଥିଲା, କିନ୍ତୁ ରବଣୀତ ବିଟୁ ଏବଂ ହର୍ଷମ୍ରତ କୌର ବାଦଲଙ୍କ ବିତର୍କରୁ ଗୋଟିଏ କଥା ସ୍ପଷ୍ଟ ହୋଇଛି ଯେ ଜାତୀୟ ସ୍ତରରେ ଏହି ପ୍ରସଙ୍ଗରେ ମତ ଏକ ରହିଲେ ମଧ୍ୟ ରାଜ୍ୟ ସ୍ତରରେ କଣ ହେବ ?

 କଂଗ୍ରେସ ମଧ୍ୟ ନୂତନ କୃଷି ଆଇନକୁ ବିରୋଧ କରୁଛି ଏବଂ ଅକାଳୀ ଦଳ ମଧ୍ୟ ଏହାକୁ ବିରୋଧ କରୁଛନ୍ତି। ଏହି ପ୍ରସଙ୍ଗରେ ଉଭୟ ଏକ ହୋଇପାରନ୍ତି। କିନ୍ତୁ ଆସନ୍ତା ବର୍ଷ ପଞ୍ଜାବରେ ନିର୍ବାଚନ ହେବାକୁ ଯାଉଛି।  ସେଠାରେ ଉଭୟ ଦଳର ଷ୍ଟାଣ୍ଡ କ’ଣ ହେବ ? ଏହି ଦଳମାନେ ସେଠାରେ ପରସ୍ପର ବିରୁଦ୍ଧରେ ଲଢିବେ ?

 ଉତ୍ତରପ୍ରଦେଶର ପରିସ୍ଥିତି ମଧ୍ୟ ସମାନ। ଆସନ୍ତା ବର୍ଷ ସେଠାରେ ଅନୁଷ୍ଠିତ ହେବାକୁ ଥିବା ବିଧାନସଭା ନିର୍ବାଚନରେ ​​କଂଗ୍ରେସ ଏବଂ ସମାଜବାଦୀ ପାର୍ଟି ଏକାଠି ଲଢିବେ କି ?  ସମାଜବାଦୀ ପାର୍ଟି ନେତା ଅଖିଳେଶ ଯାଦବ ସ୍ପଷ୍ଟ ଭାବେ କହିଛନ୍ତି ଯେ ବିଧାନସଭା ନିର୍ବାଚନରେ ​​ସେ ଛୋଟ ଦଳ ସହ ଗଠବନ୍ଧନ କରିବେ ବଡ଼ ଦଳ ସହ ନୁହେଁ।

 ଏଭଳି ପରିସ୍ଥିତିରେ ପଶ୍ଚିମବଙ୍ଗ ନିର୍ବାଚନରେ ​​ବିଜେପିର ପରାଜୟ ପରେ ବିରୋଧୀ ଯେଉଁ ଅକ୍ସିଜେନ ପାଇଥିଲେ, ତାହା ଉତ୍ତରପ୍ରଦେଶରେ ମିଳି ନପାରେ। ଏହା ହେଉଛି ତୃତୀୟ କାରଣ ଯେଉଁଥିରେ ବିଶ୍ଳେଷକମାନେ ‘ବିରୋଧୀ ଏକତା’ ବିଷୟରେ ଏପର୍ଯ୍ୟନ୍ତ ସମ୍ପୂର୍ଣ୍ଣ ଭାବେ ବିଶ୍ୱାସ କରିନାହାନ୍ତି ।

ବିରୋଧୀଙ୍କ ଆତ୍ମବିଶ୍ୱାସ ବୃଦ୍ଧି 

କଂଗ୍ରେସ ଉପରେ ଅନେକ ପୁସ୍ତକ ଲେଖିଥିବା ରସିଦ କିଦୱାଇ କହିଛନ୍ତି ଯେ ସମସ୍ତ ପ୍ରତିବାଦ ସତ୍ତ୍ବେ ବିରୋଧୀ ଦଳ ପୂର୍ବ ଅପେକ୍ଷା ଅଧିକ ଆତ୍ମବିଶ୍ୱାସୀ ଦେଖାଯାଉଛନ୍ତି। 

 ରସିଦ କୁହନ୍ତି, “ଆମେ ଇତିହାସରେ ଦେଖିଛୁ, ଯେତେବେଳେ ବି ଏପରି ସରକାର, ଯେଉଁମାନେ ବ୍ୟକ୍ତିତ୍ୱର ଚାରିପଟେ ରହିଆସିଛନ୍ତି ଏବଂ ସେମାନଙ୍କର ପତନ ଆରମ୍ଭ ହୋଇଛି। ସେ ଉଦାହରଣ ଦେଇ କହିଛନ୍ତି ଇନ୍ଦିରା ଗାନ୍ଧୀ, ରାଜୀବ ଗାନ୍ଧୀ, ପି.ଭି ନରସିଂହ ରାଓ, ଅଟଳ ବିହାରୀ ବାଜପେୟୀଙ୍କ ପରି ସମସ୍ତ ନେତା ଭାରତରେ ପ୍ରଧାନମନ୍ତ୍ରୀ ପଦରେ ବସିଥିଲେ, ଯିଏକି ‘ଖିଚିଡି’ ସରକାରର ନେତୃତ୍ୱ ନେଇଥିଲେ। ଏହି କାରଣରୁ ଯଦି ବର୍ତ୍ତମାନର ସରକାର କ୍ଷମତାରୁ ବହିଷ୍କୃତ ହୁଅନ୍ତି ତେବେ ଏକ ଗଠବନ୍ଧନ ସରକାର ଗଠନ ହୋଇପାରିବ। ଏହି ସମ୍ଭାବନାକୁ ଏଡ଼ାଇ ଦିଆଯାଇପାରିବ ନାହିଁ। ଯଦି ରାହୁଲ ଗାନ୍ଧୀ ୧୪ ଟି ପାର୍ଟି ସହିତ ଜଳଖିଆ କରୁଛନ୍ତି ତେବେ ଏଥିରେ ମଧ୍ୟ ଏକ ସମ୍ଭାବନା ଅଛି। 

 ରାହୁଲ ଗାନ୍ଧୀଙ୍କ ବିଷୟରେ ରସିଦ କିଦୱାଇ କହିଛନ୍ତି, “ରାହୁଲ ଗାନ୍ଧୀଙ୍କୁ ଏପର୍ଯ୍ୟନ୍ତ ପ୍ରଧାନମନ୍ତ୍ରୀ ପଦ ପାଇଁ ପ୍ରାର୍ଥୀ ଭାବେ ଉପସ୍ଥାପିତ କରାଯାଇ ନାହିଁ। ଏହା ପଛରେ ଏକ କାରଣ ଅଛି। ନିଜର ପ୍ରଧାନମନ୍ତ୍ରୀ ହେବା ପାଇଁ ଲୋଭ ନାହିଁ ଏବଂ ଆଗକୁ ‘ବୟସ’ ମଧ୍ୟ ଅଛି। “

 ରସିଦ ଆହୁରି କହିଛନ୍ତି, “ରାହୁଲ ଗାନ୍ଧୀଙ୍କ କଂଗ୍ରେସ ପାଇଁ ଚିନ୍ତାଧାରା ହେଉଛି ଯେ ପର୍ଯ୍ୟନ୍ତ ଦଳ ନିଜେ ‘ଅର୍ଦ୍ଧେକ’ ଆସନ ଜିତିବ ନାହିଁ, ସେ ପର୍ଯ୍ୟନ୍ତ ନେତୃତ୍ୱର କୌଣସି ପ୍ରଶ୍ନ ଉଠୁ ନାହିଁ।”

 ‘ଅଧା ଅଧା’ ଅର୍ଥ ହେଉଛି ଯେ ସଂଖ୍ୟାଗରିଷ୍ଠତା 272 ହେଲେ ଦଳ କ୍ଷମତାକୁ ଆସିବ, ତା’ହେଲେ କଂଗ୍ରେସ ମିଳିତ ନେତୃତ୍ୱର ବାଜି ଖେଳିବ ନାହିଁ ଯେପର୍ଯ୍ୟନ୍ତ ସେ 272 ରୁ ପ୍ରାୟ 136 ଟି ଆସନ ନ ଜିତିବ।

 ରସିଦ ଏହା ମଧ୍ୟ କହିଛନ୍ତି ଯେ 2024 ଲୋକସଭା ନିର୍ବାଚନରେ ​​କଂଗ୍ରେସ ପ୍ରାୟ 130 ଟି ଆସନ ଜିତିବ , ଏହା ଟିକେ କଷ୍ଟସାଧ୍ୟ ମନେହେଉଛି । ଏହି କାରଣରୁ, ମମତା ବାନାର୍ଜୀ ହେଉ କିମ୍ବା ଶରଦ ପାୱାର, ସେ କଂଗ୍ରେସ ଉପରେ ଏକ ପ୍ରକାର ଆତ୍ମବିଶ୍ୱାସରେ ଅଛନ୍ତି ଯେ ନେତୃତ୍ୱ ପ୍ରସଙ୍ଗରେ ବିରୋଧୀଙ୍କ ଏକତା ମଧ୍ୟରେ କୌଣସି ଅସୁବିଧା ହେବ ନାହିଁ। ଏହି ଦୃଷ୍ଟିକୋଣରୁ, ବିରୋଧୀ ଏକତାର ସମ୍ଭାବନା ଏବଂ ଜଟିଳତା ମଧ୍ୟ ଅଛି ।

The post ମୋଦିଙ୍କ ବିରୋଧରେ ବିରୋଧୀ କଣ ସତରେ ଏକଜୁଟ ହେଉଛନ୍ତି ? appeared first on Satya Patha.

Read Moreଜାତୀୟ, ରାଜନୀତି, Opposition unitySatya Patha

Leave a Reply

Your email address will not be published. Required fields are marked *