ପାରିବାରିକ କଳହ ଯୋଗୁଁ ଘର ଛାଡି ଶ୍ଵଶୁର ଘରକୁ ଯାଉଥିଲେ ଦମ୍ପତି: ନାଚୁଣୀରେ ହେଲା ଦୁର୍ଘଟଣା, ସ୍ଵାମୀ ମୃତ, ସ୍ତ୍ରୀ ଗୁରୁତର

ସୀତାରାମ ଅଗ୍ରୱାଲ
ଚିଲିକା: ପାରିବାରିକ କଳହ ଯୋଗୁଁ ମଧ୍ୟ ରାତ୍ରରେ ଘରୁ ବାହାରି ଶ୍ୱଶୁର ଘରକୁ ଯାଉଥିବା ବେଳେ ଦମ୍ପତିଙ୍କ ଦୁର୍ଘଟଣା ହୋଇଛି। ଦୁର୍ଘଟଣାରେ ସ୍ୱାମୀଙ୍କ ମୃତ୍ୟୁ ହୋଇଥିବା ବେଳେ ସ୍ତ୍ରୀ ଗୁରୁତର ଅଛନ୍ତି। ଖୋର୍ଦ୍ଧା ଜିଲ୍ଲା ୧୬ ନଂ ଜାତୀୟ ରାଜପଥ ନାଚୁଣୀ ଷଣ୍ଢ ଛକ ନିକଟରେ ଦମ୍ପତିଙ୍କ ଦୁର୍ଘଟଣା ଘଟିଛି।

ସୂଚନା ଅନୁଯାୟୀ, ଜଙ୍କିଆ ଥାନା ଗୋଳବାଇ ଗ୍ରାମର ସୁଶାନ୍ତ କୁମାର ସାହୁ(୩୮) ଗତ କିଛି ଦିନ ତଳେ ଟାଙ୍ଗୀ ଥାନା ନଇରୀ ଗ୍ରାମର ଛବି ସାହୁ(୧୮) ଙ୍କୁ ବିବାହ କରିଥିଲେ। ସୁଶାନ୍ତ ସାହୁଙ୍କର ଏହା ଥିଲା ଦ୍ୱୀତିୟ ବିବାହ। ପ୍ରଥମ ସ୍ତ୍ରୀ ମରିଯିବାରୁ ସେ ପୁଣି ଥରେ ଦ୍ୱିତୀୟ ବିବାହ କରିଥିଲେ। ଏହି ବିବାହକୁ କେନ୍ଦ୍ର କରି ସୁଶାନ୍ତଙ୍କ ଭାଇମାନଙ୍କ ମଧ୍ୟରେ ଗଣ୍ଡଗୋଳ ହୋଇ ଆସୁଥିଲା।

ଗତ କାଲି ରାତିରେ ସୁଶାନ୍ତଙ୍କ ଭାଇମାନେ ପୁଣି ଥରେ ସୁଶାନ୍ତ ଓ ତାଙ୍କ ପତ୍ନୀ ଛବି ସାହୁଙ୍କ ସହ ଗଣ୍ଡଗୋଳ କରିବାରୁ ଉଭୟ ଏଥିରେ ଅତିଷ୍ଠ ହୋଇ ବିଳମ୍ବିତ ରାତିରେ ଘରୁ ବାହାରି ପଡିଥିଲେ। ସୁଶାନ୍ତ ତାଙ୍କ ପତ୍ନୀଙ୍କୁ ସାଙ୍ଗରେ ଧରି ଶ୍ୱଶୁର ଘରକୁ ଯାଉଥିଲେ। ସ୍କୁଟିରେ ଯିବା ସମୟରେ ବିଳମ୍ବିତ ରାତ୍ରିରେ ହରିପୁର ଷଣ୍ଢ ଛକ ନିକଟରେ ଅଜଣା ଗାଡି ସ୍କୁଟିକୁ ଧକ୍କା ଦେଇଥିଲା। ଫଳରେ ସ୍ୱାମୀ ସ୍ତ୍ରୀ ଦୁହେଁ ସ୍କୁଟିରୁ ଛିଟିକି ପଡିଥିଲେ।

ଖବର ପାଇ ନାଚୁଣୀ ଫାଣ୍ଡି ଅଧିକାରୀ ଏବଂ ଗଙ୍ଗାଧରପୁର ଅଗ୍ନିଶମ ବାହିନୀ ଉଭୟଙ୍କୁ ସ୍ଥାନୀୟ ଲୋକଙ୍କ ସାହାଯ୍ୟରେ ଉଦ୍ଧାର କରି ୧୦୮ ଆମ୍ବୁଲାନସ ଯୋଗେ ଟାଙ୍ଗୀ ସ୍ୱାସ୍ଥ୍ୟ କେନ୍ଦ୍ରକୁ ପଠାଇଥିଲେ ଏବଂ କୁହୁଡି ଫାଣ୍ଡି ଅଧିକାରୀଙ୍କୁ ସୂଚନା ଦେଇଥିଲେ। ହେଲେ ଡାକ୍ତର ସେଠାରେ ସୁଶାନ୍ତଙ୍କୁ ମୃତ ଘୋଷଣା କରିଥିଵା ବେଳେ ତାଙ୍କ ପତ୍ନୀ ଛବିଙ୍କ ମୁଣ୍ଡରେ ଗଭୀର କ୍ଷତ ହୋଈଛି। କୁହୁଡି ଫାଣ୍ଡି ପୋଲିସ ସ୍କୁଟି ଜବତ କରି ତଦନ୍ତ ଆରମ୍ଭ କରିଛି।

Read Moreଆଜିର ଖବର, ରାଜ୍ୟ ଖବର, କୁହୁଡି ଫାଣ୍ଡି ପୋଲିସ, ଦୁର୍ଘଟଣା, ନାଚୁଣୀରେ ଦୁର୍ଘଟଣା, ପାରିବାରିକ କଳହ, ସ୍ତ୍ରୀ ଗୁରୁତର, ସ୍ଵାମୀ ମୃତThe Samikhsya Odia

Leave a Reply

Your email address will not be published. Required fields are marked *