ଜନସଂଖ୍ୟା ନିୟନ୍ତ୍ରଣ ଆଇନ ଆଣିବା ପାଇଁ କେନ୍ଦ୍ରର ପ୍ରସ୍ତୁତି , ଅଗଷ୍ଟ ୬ ରେ ରାଜ୍ୟସଭାରେ ପ୍ରାଇଭେଟ୍ ମେମ୍ବର ବିଲ୍ ଉପରେ ହୋଇପାରେ ଆଲୋଚନା

(ସତ୍ୟପାଠ ବ୍ୟୁରୋ) ଭୁବନେଶ୍ୱର : ଜନସଂଖ୍ୟା ନିୟନ୍ତ୍ରଣକୁ ନେଇ ଉତ୍ତରପ୍ରଦେଶ ସରକାରଙ୍କ ” ଜନସଂଖ୍ୟା ନିୟନ୍ତ୍ରଣ ନୀତି ୨୦୨୧-୩୦ ” ଆସିବା ପରଠାରୁ ସାରା ଦେଶରେ ଚର୍ଚ୍ଚା ଆରମ୍ଭ ହୋଇଛି। ଏହା ମଧ୍ୟରେ ସୂଚନା ମିଳିଛି ଯେ କେନ୍ଦ୍ର ସରକାର ମଧ୍ୟ ଜନସଂଖ୍ୟା ନିୟନ୍ତ୍ରଣ ଉପରେ ଏକ ଆଇନ ଆଣିବାକୁ ପ୍ରସ୍ତୁତି ଚଳାଇଛନ୍ତି।  ଏହି ଆଇନ ଆଣିବା ପୂର୍ବରୁ ଭାରତୀୟ ଜନତା ପାର୍ଟିର ଶୀର୍ଷ ନେତୃତ୍ୱ ଧୀରେ ଧୀରେ ଏହି ପ୍ରସଙ୍ଗରେ ଆଗକୁ ବଢୁଛନ୍ତି। ଗୋଟେ ପଟେ ବିଜେପି ଶାସିତ ରାଜ୍ୟମାନଙ୍କୁ ଜନସଂଖ୍ୟା ନିୟନ୍ତ୍ରଣ ଉପରେ ନୀତି ଉପସ୍ଥାପନ କରିବାକୁ କୁହାଯାଇଛି ଯାହା ଦ୍ବାରା ସାରା ଦେଶରେ ଏହି ପ୍ରସଙ୍ଗରେ ମାହୋଲ ସୃଷ୍ଟି ହୋଇପାରିବ।  ଏହି ପର୍ଯ୍ୟାୟରେ ଉତ୍ତରପ୍ରଦେଶ ସରକାର ଜନସଂଖ୍ୟା ନିୟନ୍ତ୍ରଣ ନୀତି ଘୋଷଣା କରିଛନ୍ତି। 

       ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ମଧ୍ୟ କହିଛନ୍ତି ଯେ ଖୁବ ଶୀଘ୍ର ଏହି ନୀତି ଉପରେ ନିଷ୍ପତ୍ତି ନିଆଯିବ। ଅନ୍ୟପକ୍ଷରେ, ରାଜ୍ୟସଭା ସାଂସଦଙ୍କ ମାଧ୍ୟମରେ ଗୃହରେ ପ୍ରାଇଭେଟ୍ ମେମ୍ବର ବିଲ୍ ଆଗତ କରିବାର ଯୋଜନା କରାଯାଇଛି ଯାହାଦ୍ୱାରା ଏହି ଆଇନ ପ୍ରଣୟନ ହୋଇପାରିବ।  କୁହାଯାଉଛି ଯେ ଏହି ମୌସୁମୀ ଅଧିବେଶନରେ ଲୋକସଭାର ଅର୍ଦ୍ଧ ଡଜନ ସାଂସଦ ମଧ୍ୟ ସମାନ ଏହି ପ୍ରସଙ୍ଗରେ ଏକ ପ୍ରାଇଭେଟ୍ ମେମ୍ବର ବିଲ୍ ଆଣିବା ପାଇଁ ଯୋଜନା କରୁଛନ୍ତି। 

ରାଜ୍ୟସଭାରେ ପୂର୍ଣ୍ଣ ସଂଖ୍ୟାଗରିଷ୍ଠତା ଅଭାବରୁ ବିରୋଧୀ ଦଳଙ୍କ ସମର୍ଥନ ହାସଲ କରିବାର ପ୍ରୟାସ

 ବିଜେପି ସାଂସଦ ସୁବ୍ରମଣ୍ୟମ ସ୍ବାମୀ , ହରନାଥ ସିଂ ଯାଦବ ଏବଂ ଅନିଲ ଅଗ୍ରୱାଲ ରାଜ୍ୟସଭାରେ ଏହି ବିଲ୍ ଆଗତ କରିଛନ୍ତି। କୁହାଯାଉଛି ଯେ ଖୁବ ଶୀଘ୍ର ମୌସୁମୀ ଅଧିବେଶନରେ ଏହି ବିଲ୍ ଉପରେ ଆଲୋଚନା ହେବ।  ଏଥିପାଇଁ ଅଗଷ୍ଟ ୬ ତାରିଖ ସ୍ଥିର କରାଯାଇଛି ଏବଂ ଏହା ଉପରେ ଭୋଟିଂ ମଧ୍ୟ କରାଯିବାର ସମ୍ଭାବନା ରହିଛି। ବିଶେଷଜ୍ଞମାନେ କହିଛନ୍ତି ଯେ ଆଇନ ମନ୍ତ୍ରଣାଳୟ କିମ୍ବା ଗୃହ ମନ୍ତ୍ରଣାଳୟ ଏକ ବିଲ୍ କିମ୍ବା ପ୍ରାଇଭେଟ୍ ମେମ୍ବର ବିଲ୍ ଆଣନ୍ତୁ, ଏଥିରେ କୌଣସି ପାର୍ଥକ୍ୟ ନାହିଁ।

  ସୂତ୍ରରୁ ମିଳିଥିବା ସୂଚନା ମୁତାବକ ଜନସଂଖ୍ୟା ନିୟନ୍ତ୍ରଣ ସମ୍ବନ୍ଧୀୟ ଆଇନ ପ୍ରସ୍ତୁତ କରିବା ବର୍ତ୍ତମାନ ସରକାରଙ୍କ ଏଜେଣ୍ଡାର ଶୀର୍ଷରେ ରହିଛି। ତେଣୁ ପ୍ରାଇଭେଟ୍ ମେମ୍ବର ବିଲ୍ ମାଧ୍ୟମରେ ଆଣି ରାଜ୍ୟସଭାରେ ପାରିତ କରିବାକୁ ଯୋଜନା କରୁଛନ୍ତି ସରକାର ଏବଂ ବିରୋଧୀ ଦଳଙ୍କ ସମର୍ଥନ ହାସଲ କରିବାକୁ ମଧ୍ୟ ଉଦ୍ୟମ ଚାଲିଛି। ଏହି ପରିପ୍ରେକ୍ଷୀରେ ଉତ୍ତରପ୍ରଦେଶ ସରକାରଙ୍କ ଜନସଂଖ୍ୟା ନିୟନ୍ତ୍ରଣ ନୀତିକୁ ଏନସିପି ମୁଖ୍ୟ ଶରଦ ପାୱାରଙ୍କ ବୟାନକୁ ମଧ୍ୟ ଦେଖାଯାଉଛି। ଯେକୌଣସି ବିଲ୍ ସଂସଦର ଉଭୟ ଗୃହ ଦ୍ୱାରା ପାରିତ ହେବାକୁ ପଡିବ।

 ମୁଁ ନିଜେ ବିଲ୍ କୁ ସମର୍ଥନ କରିବା ପାଇଁ ବିରୋଧୀ ଦଳଙ୍କ ସମର୍ଥନ ଲୋଡ଼ିବି : ସାଂସଦ ଅନୀଲ ଅଗ୍ରୱାଲ 

 ପ୍ରାଇଭେଟ୍ ମେମ୍ବର ବିଲ୍ ଉପସ୍ଥାପନ କରିଥିବା ରାଜ୍ୟସଭା ସାଂସଦ ଅନିଲ ଅଗ୍ରୱାଲ ଏକ ଜାତୀୟ ଗଣମାଧ୍ୟମ ସହ ଆଲୋଚନାରେ କହିଛନ୍ତି ଯେ 15 ଅଗଷ୍ଟ 2019 ରେ ଲାଲ୍ କିଲ୍ଲାରୁ ଜନସଂଖ୍ୟା ନିୟନ୍ତ୍ରଣ ବିଷୟରେ ପ୍ରଧାନମନ୍ତ୍ରୀ କହି ସାରିଛନ୍ତି। ବର୍ତ୍ତମାନ ସମୟ ଆସିଛି ଯେ ଜନସଂଖ୍ୟା ନିୟନ୍ତ୍ରଣ ନୀତି କାର୍ଯ୍ୟକାରୀ ହେବା ଉଚିତ ଏବଂ ରାଜନୈତିକ ଦଳ ଗୁଡ଼ିକ ରାଜନୀତିରୁ ଉପରକୁ ଉଠି ଏହି ଜାତୀୟ ପ୍ରସଙ୍ଗରେ ଏକାଠି ହେବା ଉଚିତ୍। ସେ କହିଛନ୍ତି ଯେ ଯେଉଁଭଳି ଭାବରେ ଜନସଂଖ୍ୟା ବିସ୍ଫୋରଣ ବିକାଶରେ ବାଧା ସୃଷ୍ଟି କରୁଛି, ଆମେ ଆଶା କରୁଛୁ ଯେ ସମସ୍ତ ବିରୋଧୀ ଦଳ ମଧ୍ୟ ଏହା ଉପରେ ଏକାଠି ହେବେ।  ମିଳିତ ଭାବେ ଆମେ ତିନିଜଣ ସାଂସଦ ଏହା ଉପରେ ଏକ ପ୍ରାଇଭେଟ୍ ମେମ୍ବର ବିଲ୍ ଉପସ୍ଥାପନ କରିଛୁ।  ଯଦିଓ ରାଜ୍ୟସଭାରେ ଆମର ପୂର୍ଣ୍ଣ ସଂଖ୍ୟାଗରିଷ୍ଠତା ନାହିଁ, ଆମର ଶୀର୍ଷ ନେତୃତ୍ୱ ମଧ୍ୟ ବିରୋଧୀ ଦଳଙ୍କ ସମର୍ଥନ ପାଇବାକୁ ଚେଷ୍ଟା କରିବେ।  ଏଥି ସହିତ, ମୁଁ ନିଜେ ମୋର ବିଲ୍ ସମ୍ବନ୍ଧରେ ବିରୋଧୀ ଦଳର ସମର୍ଥନ ଲୋଡ଼ିବି।

 2019 ରେ ରାକେଶ ସିହ୍ନା ମଧ୍ୟ ସମାନ ବିଲ୍ ଆଗତ କରିଥିଲେ

 ଏହାପୂର୍ବରୁ 2019 ରେ ରାଜ୍ୟସଭା ସାଂସଦ ରାକେଶ ସିହ୍ନା ମଧ୍ୟ ‘ଜନସଂଖ୍ୟା ନିୟାମକ ବିଲ୍, 2019’ ଆଗତ କରିଛନ୍ତି ଯାହାକି ବିଚାରାଧୀନ ଅଛି।  ଯେଉଁମାନଙ୍କର ଦୁଇରୁ ଅଧିକ ସନ୍ତାନ ଅଛନ୍ତି ସେମାନଙ୍କୁ ଦଣ୍ଡ ଦେବା ଏବଂ ସେମାନଙ୍କୁ ସମସ୍ତ ସରକାରୀ ସୁବିଧା ଠାରୁ ବଞ୍ଚିତ କରିବାକୁ ମଧ୍ୟ ପ୍ରସ୍ତାବ ଦିଆଯାଇଛି।

  ସୁପ୍ରିମକୋର୍ଟର ପ୍ରସିଦ୍ଧ ଓକିଲ ଅଶ୍ୱିନୀ ଉପାଧ୍ୟାୟଙ୍କ ଦ୍ବାରା ଏହି ତିନୋଟି ବିଲ୍ ର ଡ୍ରାଫ୍ଟ ପ୍ରସ୍ତୁତ କରାଯାଇଛି।  ଉପାଧ୍ୟାୟ କହିଛନ୍ତି ଯେ ମୁଁ ଜନସଂଖ୍ୟା ନିୟନ୍ତ୍ରଣ ସମ୍ବନ୍ଧରେ ଏକ ବିଲ୍ ପ୍ରସ୍ତୁତ କରିବାକୁ ସମସ୍ତଙ୍କୁ ଏକ ପ୍ରସ୍ତାବ ଦେଇଛି।  ସୁବ୍ରମଣ୍ୟମ ସ୍ବାମୀଙ୍କ ସମେତ ଏହି ତିନିଜଣ ସାଂସଦ ମୋ ସହ ଯୋଗାଯୋଗ କଲେ ଏବଂ ମୁଁ ଏକ ଡ୍ରାଫ୍ଟ ପ୍ରସ୍ତୁତ କଲି।  ତାଙ୍କ କହିବାନୁସାରେ, ଏହି ପରିପ୍ରେକ୍ଷୀରେ ପ୍ରାଇଭେଟ୍ ମେମ୍ବର ବିଲ୍ ର ଡ୍ରାଫ୍ଟ ପ୍ରସ୍ତୁତ କରିବାକୁ କିଛି ଲୋକସଭା ସାଂସଦ ମଧ୍ୟ ତାଙ୍କ ନିକଟକୁ ଆସିଛନ୍ତି।

 11 ଜୁଲାଇରେ ବିଶ୍ୱ ଜନସଂଖ୍ୟା ଦିବସ ଅବସରରେ ଅଶ୍ୱିନୀ ଉପାଧ୍ୟୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଏହି ପ୍ରସଙ୍ଗରେ ଆଉ ଏକ ଚିଠି ଲେଖିଛନ୍ତି।  ଉପାଧ୍ୟୟ ଲେଖିଛନ୍ତି ଯେ ଜନସଂଖ୍ୟା ବିସ୍ଫୋରଣ କେବଳ ଉତ୍ତରପ୍ରଦେଶ ଏବଂ ଆସାମର ସମସ୍ୟା ନୁହେଁ ବରଂ ଏହା ହେଉଛି ଏକ ଜାତୀୟ ସମସ୍ୟା।  ତେଣୁ ଏହାର ସମାଧାନ ମଧ୍ୟ ଜାତୀୟ ସ୍ତରରେ ହେବା ଉଚିତ୍।  ହର୍ନାଥ ସିଂ ଯାଦବ, ଅନିଲ ଅଗ୍ରୱାଲ ଏବଂ ସୁବ୍ରମଣ୍ୟମ ସ୍ୱାମୀ ବ୍ୟକ୍ତିଗତ ବିଲ୍ ଆଗତ କରିଛନ୍ତି।  ସଂସଦରେ ସମାନ ବିଲ୍ ଆଣିବାକୁ ଗୃହ ମନ୍ତ୍ରଣାଳୟ କିମ୍ବା ସ୍ୱାସ୍ଥ୍ୟ ମନ୍ତ୍ରଣାଳୟକୁ ନିର୍ଦ୍ଦେଶ ଦେବାକୁ ସେ ଅନୁରୋଧ କରିଛନ୍ତି। ଆଇନ ପ୍ରଣୟନ କରିବାକୁ ଅନୁରୋଧ କରିବା ପୂର୍ବରୁ ଉପାଧ୍ୟାୟ ଏ ସମ୍ପର୍କରେ PMO କୁ ଚିଠି ଲେଖିଛନ୍ତି।  

ବିଲ୍ ରେ ଜନସଂଖ୍ୟା ନିୟନ୍ତ୍ରଣ ରଖିବା ପାଇଁ ଅନେକ ବ୍ୟବସ୍ଥା 

 ଜନସଂଖ୍ୟା ନିୟନ୍ତ୍ରଣ କରିବା ପାଇଁ ଏହି ବିଲ୍ ରେ ଅନେକ ବ୍ୟବସ୍ଥା ସୁପାରିଶ କରାଯାଇଛି।  ପ୍ରସ୍ତାବ ଅନୁଯାୟୀ, ଯଦି ଏକ ଦମ୍ପତି ଦୁଇଟି ସନ୍ତାନ କରନ୍ତି, ତେବେ ସେମାନଙ୍କ ପାଇଁ କୌଣସି ଅତିରିକ୍ତ ଛାଡ କିମ୍ବା ଲାଭ ଦିଆଯିବ ନାହିଁ । ଦୁଇରୁ ଅଧିକ ପିଲା ଥିଲେ ସରକାରୀ ଚାକିରୀ ମିଳିବ ନାହିଁ ଏବଂ ଭୋଟ୍ ଦେବାର ଅଧିକାର, ନିର୍ବାଚନରେ ଲଢିବା ଏବଂ ରାଜନୈତିକ ଦଳ ଗଠନ କରି ହେବ ନାହିଁ ।  ଏକକ ଶିଶୁ ନୀତିକୁ ଉତ୍ସାହିତ କରିବା ପାଇଁ ଡ୍ରାଫ୍ଟରେ ଅନେକ ବ୍ୟବସ୍ଥା କରାଯାଇଛି । ଏହି ବିଲ୍ ରେ ପ୍ରାବଧାନ ରହିଛି ଜଣେ ବ୍ୟକ୍ତିଙ୍କର ଦୁଇରୁ ଅଧିକ ସନ୍ତାନ କରିବା ଦ୍ଵାରା ମୌଳିକ ଅଧିକାରରେ କୌଣସି ଆଞ୍ଚ୍ ଆସିବ ନାହିଁ। 

The post ଜନସଂଖ୍ୟା ନିୟନ୍ତ୍ରଣ ଆଇନ ଆଣିବା ପାଇଁ କେନ୍ଦ୍ରର ପ୍ରସ୍ତୁତି , ଅଗଷ୍ଟ ୬ ରେ ରାଜ୍ୟସଭାରେ ପ୍ରାଇଭେଟ୍ ମେମ୍ବର ବିଲ୍ ଉପରେ ହୋଇପାରେ ଆଲୋଚନା appeared first on Satya Patha.

Read Moreଜାତୀୟ, Parliament monsoon session, Population control Draft, rajya sabhaSatya Patha

Leave a Reply

Your email address will not be published. Required fields are marked *