ଅଣ୍ଡା ବୋଝେଇ ପିକଅପ ଭ୍ୟାନ ଲୁଟ୍ ଘଟଣାର ପର୍ଦ୍ଦାଫାଶ୍ କଲା ଟାଙ୍ଗୀ ପୋଲିସ୍: ଗାଡି ଜବତ, ୩ ଗିରଫ

ସୀତାରାମ ଅଗ୍ରୱାଲ

ଟାଙ୍ଗୀ: ଖୋର୍ଦ୍ଧା ଜିଲ୍ଲା ୧୬ ନଂ ଜାତୀୟ ରାଜପଥ ଉଗ୍ରତାରା ଛକରୁ ଅଣ୍ଡା ବୋଝେଇ ପିକଅପ ଭ୍ୟାନ ଲୁଟ୍ ଘଟଣାର ଟାଙ୍ଗୀ ପୋଲିସ୍ ପର୍ଦ୍ଦାଫାଶ୍ କରିଛି। ଲୁଟ୍ ପିକଅପ ଭ୍ୟାନ ସହ ୩ ଲୁଟେରାକୁ ପୋଲିସ ଗିରଫ କରିଛି। ଆଜି ସାମ୍ବାଦିକ ସମ୍ମିଳନୀରେ ଏ ନେଇ ବାଲୁଗାଁ ଏସଡ଼ିପିଓ ମାନସ ରଂଜନ ବାରିକ ସୂଚନା ଦେଇଛନ୍ତି।

ଏସଡ଼ିପିଓଙ୍କ ସୂଚନା ମୁତାବକ ଗତ ୩ ତାରିଖ ବିଳମ୍ବିତ ରାତିରେ ୧୬ ନଂ ଜାତୀୟ ରାଜପଥ ଟାଙ୍ଗୀ ଥାନା ଉଗ୍ରତାରା ଛକରେ ବ୍ରହ୍ମପୁର ଗୋଳନ୍ଥରାରୁ ଜଳେଶ୍ୱର ନେଇ ଯାଉଥିବା ଅଣ୍ଡା ବୋଝେଇ ପିକ୍ ଅପ୍ ଭ୍ୟାନ (ଓଡ଼ି-୦୧ ଏସି- ୧୭୭୨) କୁ ଲୁଟେରାମାନେ ଲୁଟି ନେଇଥିଲେ। ୩ଟି ବାଇକ୍ ରେ ୬ ଜଣ ଲୁଟେରା ଆସି ଗାଡି ଚାଳକଙ୍କୁ ମାଡ ମାରି  ଲୁଟେରାମାନେ ଲୁଟି ନେଇଥିଲେ।

ଘଟଣାକୁ ଗୁରୁତର ସହ ନେଇ ଜିଲ୍ଲା ଆରକ୍ଷୀ ଅଧିକ୍ଷକ ତୁରନ୍ତ ଖୋର୍ଦ୍ଧା ସ୍ୱତନ୍ତ୍ର ସ୍କ୍ୱାର୍ଡକୁ ମିଶାଇ ତିନି ଗୋଟି ଟିମ ତିଆରି କରିଥିଲେ। ଉକ୍ତ ଟିମ କୁ ଟାଙ୍ଗୀ ଆଇଆଇସି ବିଜୟ କୁମାର ମଲ୍ଲିକ ଏବଂ ଭୂଷଣ୍ଡପୁର ଫାଣ୍ଡି ଅଧିକାରୀ ମାଧବାନନ୍ଦ ବସ୍ତିଆ ପରିଚାଳନା କରିଥିବାବେଳେ ଉକ୍ତ ଟିମ ଖୋର୍ଦ୍ଧା ଜିଲ୍ଲାରେ ଏବଂ ଜିଲ୍ଲା ବାହାରେ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଥିଲା।

ତେବେ ଗତକାଲି ଟାଙ୍ଗୀ ପୋଲିସ୍ ଉକ୍ତ ଘଟଣାରେ ତିନି ଜଣ ଅଭିଯୁକ୍ତଙ୍କୁ ଗିରଫ କରିବା ସହ ଲୁଟ୍ ପିକଅପ ଭ୍ୟାନ,ଗୋଟିଏ ବାଇକ୍,୩ ଟି ମୋବାଇଲ ଫୋନ୍ ଏବଂ ୧୨୦୦ ଟଙ୍କା ଜବତ କରିଛି। ଗିରଫ ଲୁଟେରାମାନେ ହେଲେ ରଣପୁରର ଶେଖ୍ ଇମରାନ, ଖୋର୍ଦ୍ଧାର ମହମ୍ମଦ ସାବିର୍ ଓ ଜଟଣୀର ଅଂଚଳର ଶେଖ ସନୱାର ଓରଫ ସୋନୁ। ଆଜି ସମସ୍ତ ଗିରଫ ଅଭିଯୁକ୍ତଙ୍କୁ କୋର୍ଟଚାଲାଣ କରାଯାଇ ଉକ୍ତ ଘଟଣାର ତଦନ୍ତ ଜାରିରହିଥିବାର ଏସଡ଼ିପିଓ ଶ୍ରୀ ବାରିକ ସୂଚନା ଦେଇଛନ୍ତି।

Read Moreଅପରାଧ, ଆଜିର ଖବର, ରାଜ୍ୟ ଖବର, ଟାଙ୍ଗୀ ପୋଲିସ୍, ପିକଅପ ଭ୍ୟାନ ଲୁଟ୍ ଘଟଣାThe Samikhsya Odia

Leave a Reply

Your email address will not be published. Required fields are marked *