ଅଭିନେତ୍ରୀ ବର୍ଷା ପ୍ରିୟଦର୍ଶିନୀ କରିବେ ରାଜନୀତି, 2024 ନିର୍ବାଚନ ପାଇଁ ଆରମ୍ଭ କଲେଣି ପ୍ରସ୍ତୁତି

ଭୁବନେଶ୍ବର, ସାଂସଦ ଅନୁଭବ ମହାନ୍ତିଙ୍କ ଧର୍ମପତ୍ନୀ ତଥା ଅଭିନେତ୍ରୀ ବର୍ଷା ପ୍ରିୟଦର୍ଶିନୀ ଏବେ ରାଜନୀତି କରିବେ। ତେବେ ଏହା ବର୍ଷାଙ୍କର କୌଣସି ଘୋଷଣା ନୁହେଁ, ବରଂ ତାଙ୍କର ହାବଭାବ ଦେଖି ସ୍ପଷ୍ଟ ହୋଇଛି ଯେ, ବର୍ଷା କେଉଁ ମୂର୍ହୁତରେ ରାଜନୈତିକ ମଞ୍ଚକୁ ଲମ୍ପ ପ୍ରଦାନ କରିବେ। ତାଙ୍କର ନିକଟତମ ମହଲର କହିବା ଅନୁସାରେ ବର୍ଷା 2024 ନିର୍ବାଚନକୁ ଦୃଷ୍ଟିରେ ରଖି ବର୍ତ୍ତମାନଠାରୁ କାମ ଆରମ୍ଭ କରିଛନ୍ତି। ତେବେ ବର୍ଷା ରାଜନୀତି କରିବାର କେତେକ କାରଣ ଆମେ ଏଠାରେ ଉପସ୍ଥାପିତ କରୁଛୁ।

ପ୍ରଥମ କଥା ହେଲା ବର୍ଷାଙ୍କର ରାଜନୀତି କରିବାର ବାସ୍ନା ତାଙ୍କ ସୋସିଆଲ ମିଡିଆରୁ ସ୍ପଷ୍ଟ ବାରି ହୋଇପଡୁଛି। ନିକଟରେ ସେ ଏକ ପୋଷ୍ଟ କରିଛନ୍ତି ଯାହାକୁ ନେଇ ଚାଲିଛି ଚର୍ଚ୍ଚା। ତାହା ହେଲା ମୁଖ୍ୟମନ୍ତ୍ରୀଙ୍କ ଫଟୋ ଥିବା ଏକ ବ୍ୟାନର ଆଗରେ ଛିଡା ହୋଇଥିବା ଫଟୋ ସେ ସୋସିଆଲ ମିଡିରେ ସେୟାର କରିଛନ୍ତି।

ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କଳିଙ୍ଗ ଷ୍ଟାଣ୍ଡିୟମର ନବୀକରଣ କାର୍ଯ୍ୟ ଶିଳାନ୍ୟାସ କରିବା ସମୟର ହେଉଛି ସେହି ଫଟୋ। ନବୀନଙ୍କ ଫଟୋକୁ ବ୍ୟାକଗ୍ରାଉଣ୍ଡ କରି ଫଟୋ ନେବା ଏବଂ ସୋସିୟାଲ ମିଡିଆରେ ସେୟାର କରିବାର ଆଗ୍ରହକୁ ପ୍ରମାଣିତ କରିଛି ଯେ ‘ତମ ଭିତରେ କିଛି ଅଛି କି’ ?

ସେତିକି ନୁହେଁ, ଅନୁଭବଙ୍କ ସହିତ ବିବାଦ ଆରମ୍ଭ ହେବାର କିଛି ମାସ ପରେ ପରେ ସେ ବିଭିନ୍ନ ସାମାଜିକ କାର୍ଯ୍ୟରେ ମଧ୍ୟ ହାତ ଦେଇଛନ୍ତି। ପରିବାରର ଭିତରେ ଅଶାନ୍ତି ଥିଲେ ମଧ୍ୟ ସେ ଏହି ସାମାଜିକ କାର୍ଯ୍ୟ କରିବା ପଛରେ ରାଜନୈତିକ ବାସ୍ନା ବାରି ହୋଇପଡୁଛି। ପ୍ରଥମେ ବର୍ଷା କଟକର କେତେକ ସେଚ୍ଛାସେବୀ ତଥା ସାମ୍ବାଦିକଙ୍କ ସହଯୋଗରେ ବିଭିନ୍ନ ପାଠାଗାରକୁ ପୁସ୍ତକ ପ୍ରଦାନ କାର୍ଯ୍ୟ ଆରମ୍ଭ କଲେ। ଏହା ଦ୍ବାରା ବିଭିନ୍ନ ଅନୁଷ୍ଠାନ ତରଫରୁ ତାଙ୍କୁ ବହୁତ ସ୍ବାଗତ ମଧ୍ୟ କରାଗଲା।

ମାଗଣା ପୁସ୍ତକ ବଣ୍ଟନ ସହିତ ସେ କରୋନା ସମୟରେ ଗରିବ ଲୋକଙ୍କୁ ଖାଇବା ମଧ୍ୟ ପ୍ରଦାନ କରିବାରେ ଲାଗିଛନ୍ତି। ସେ ଯେଉଁ ସ୍ଥାନକୁ ଯାଉଛନ୍ତି ସେଠାକାର ଫଟୋକୁ ସୋସିଆଲ ମିଡିଆରେ ସେୟାର ମଧ୍ୟ କରୁଛନ୍ତି। ଯାହା ଫଳରେ ତାଙ୍କ ପ୍ରଶଂସକମାନେ ବର୍ଷାଙ୍କର ଏହି କାର୍ଯ୍ୟକୁ ବେଶ୍ ପ୍ରଶଂସା ମଧ୍ୟ କରୁଛନ୍ତି। ନିକଟରେ ବର୍ଷା ରେଳ ଷ୍ଟେସନରେ କୁଲି ତଥା ଚତୁର୍ଥ ଶ୍ରେଣୀ କର୍ମଚାରୀଙ୍କୁ ଖାଦ୍ୟ ପୁଡିଆ ବଣ୍ଟନ ମଧ୍ୟ କରିଥିଲେ। ଏହି କାର୍ଯ୍ୟ ପାଇଁ ସେ ସମ୍ମାନିତା ନାମିତ ଏକ ସଂସ୍ଥା ସହିତ ଜଡିତ ମଧ୍ୟ ହୋଇଛନ୍ତି।

ବର୍ତ୍ତମାନ ବର୍ଷାଙ୍କର ଅଭିନେତା ସ୍ବାମୀ ତଥା କେନ୍ଦ୍ରାପଡା ସାଂସଦ ଅନୁଭବ ମହାନ୍ତିଙ୍କ ସହିତ ବିବାହ ବିଚ୍ଛେଦ ମାମଲା ଚାଲିଛି। ଏଥିପାଇଁ ଅନୁଭବକୁ ବର୍ତ୍ତମାନ ବିଜେଡି ଏକ ଘରକିଆ କରିଦେଇଛି। ଏହି ଘଟଣା ପରେ ଅନୁଭବଙ୍କୁ ଦଳ କୌଣସି ଦଳୀୟ କାର୍ଯ୍ୟକ୍ରମରେ ସ୍ଥାନିତ କରୁ ନାହିଁ। ତିନୋଟି ଉପନିର୍ବାଚନରେ ବିଜେଡି ଅନୁଭବଙ୍କୁ ଷ୍ଟାର ପ୍ରଚାରକ ତାଲିକାରୁ ବାଦ ଦେଇଛନ୍ତି। ଏହାର ସୁଯୋଗ କୁଆଡେ ବର୍ଷାଙ୍କୁ ଦିଆଯିବ ବୋଲି ଚର୍ଚ୍ଚା ଚାଲିଛି।

Read Moreଜାତୀୟ ଖବର, ବିଶେଷ ଖବର, ବ୍ୟକ୍ତିତ୍ୱ, ରାଜ୍ୟ ଖବର, ଅନୁଭବ ମହାନ୍ତି, ଅଭିନେତ୍ରୀ ବର୍ଷା, ବର୍ଷା ପ୍ରିୟଦର୍ଶିନୀThe Samikhsya Odia

Leave a Reply

Your email address will not be published. Required fields are marked *