ପ୍ରଥମ ପ୍ରେମିକା ପତ୍ନୀକୁ ପ୍ରତାରଣା: ଦ୍ୱିତୀୟ ବିବାହ କରି ଜେଲ୍ ଗଲା ଯୁବକ

କନ୍ଦର୍ପ ବେହେରା
ରେଢାଖୋଲ: ପ୍ରେମ ମାନେନା ବାଧା ବନ୍ଧନ। ପ୍ରେମ ହିଁ ଜୀବନ। ଏଇ ପ୍ରେମ ପାଇଁ କିଏ ପାଗଳ ହୋଇ ଯାଇଛି ତ ଆଉ କାର ଜୀବନ ଯାଉଛି। ଏଇ ପ୍ରେମ ପାଇଁ ଆଉ କେହି ଜେଲ ଯାଉଛି। ଏଇ ପ୍ରେମ କିନ୍ତୁ ଅଲଗା ପ୍ରଥମ ପ୍ରେମିକା ପତ୍ନୀକୁ ପ୍ରତାରଣା କରି ଅନ୍ୟତ୍ର ବିବାହ କରି ଶେଷରେ ଜେଲ ଯିବା ଭଳି ଘଟଣା ନାକଟିଦେଉଳ ଅଂଚଳରେ ବେଶ୍ ଚାଂଚଲ୍ୟ ସୃଷ୍ଟି କରିଛି।

ପୋଲିସ୍ ସୂତ୍ରରୁ ପ୍ରକାଶ ଯେ, ଦେବଗଡ ଜିଲ୍ଲା ରିଆମାଳ ଥାନା ଟୁହିଲାମାଳ ଗ୍ରାମର ନୀଳାବତୀ ମାଟିଆରୀ (୩୦)ନାମକ ଜନୈକା ଯୁବତୀ ଦେବଗଡ ନିଯୁକ୍ତିମେଳା ରେ ମନୋନୀତ ହୋଇ ଗୁଜୁରାଟ ରେ ଜିଏଚ୍‌ସିଏଲ୍ ନାମକ କଂପାନୀରେ ୨୦୧୫ ରେ ନିଯୁକ୍ତି ପାଇଥିଲେ। ନାକଟିଦେଉଳ ଥାନା ସରାପାଲି ପଂଚାୟତ ମାରଓାଡିମୁଣ୍ଡା ଗ୍ରାମର ସୁଧାଂଶୁ ଶେଖର ରାଉଳ ନାମକ (୩୨) ଯୁବକ ନୀଳାବତୀକୁ ଗୁଜୁରାଟରେ କାମ କରିବାକୁ ପଚାରିବାରୁ ନୀଳାବତୀ ହଁ କରିଥିଲେ। ସୁଧାଂଶୁ ଗୁଜୁରାଟ ଚାଲିଯାଇ ଦି ଜଣ ଏକାଠି ୨୦୧୭ ରୁ ୨୦୨୦ ମାର୍ଚ୍ଚ ପର୍ଯ୍ୟନ୍ତ ଏକାଠି ରହିଥିଲେ। ଏହା ଭିତରେ ସେମାନଙ୍କୁ ପୁତ୍ର ସନ୍ତାନଟିଏ ମଧ୍ୟ ଜନ୍ମ ହୋଇଥିଲା।

ବର୍ତ୍ତମାନ ପିଲାଟିର ବୟସ ୨ବର୍ଷ। ସୁଧାଂଶୁ ନିଜର ପ୍ରେମିକା ପତ୍ନୀକୁ କେରଳ ଯାଉଛି ସେଠାରେ ଅଧିକ ରୋଜଗାର ହେବ କହି ନିଜ ଗାଁ ମାରଓାଡିମୁଣ୍ଡାକୁ ପଳାଇ ଆସିଥିଲା। ବିଶ୍ୱାସ ଜନ୍ମାଇବାକୁ ପ୍ରତିମାସରେ ସୁଧାଂଶୁ ପ୍ରେମିକା ପତ୍ନୀକୁ ୫ ହଜାର ଟଙ୍କା ଲେଖାଏଁ ପଠାଉଥିଲା। ହେଲେ ଗତ ଅପ୍ରେଲ ଓ ମଇ ମାସ ୨୦୨୧ ରେ ପ୍ରେମିକା ପତ୍ନୀ ପାଖକୁ ଟଙ୍କା ନ ପଠାଇବାରୁ ତାର ମନରେ ସନ୍ଦେହ ଯାତ ହେଲା। ଗତ ତା ୧୨/୫/୨୦୨୧ ରେ ସୁଧାଂଶୁ ପାତ୍ରପଡା ଅଂଚଳରେ ବିବାହ କରି ପକାଇଥିଲା।

କୈାଣସି ସୂତ୍ରରୁ ପୂର୍ବ ପ୍ରେମିକା ପତ୍ନୀ ଖବର ପାଇ ଗୁଜୁରାଟରୁ ଫେରିଆସି ଆଜି ନାକଟିଦେଉଳ ଥାନାକୁ ଆସି ଲିଖିତାକାରରେ ଅଭିଯୋଗ କଲା ପରେ ନାକଟିଦେଉଳ ଥାନାଧିକାରୀ ବିଧୂଭୂଷଣ ମିଶ୍ର ପ୍ରତାରିତ ଯୁବକକୁ ଥାନାକୁ ଆଣି ପଚରାଉଚୁରା କରିଥିଲେ। ଉଭୟକୁ ପତ୍ନୀ ହିସାବରେ ରଖିବା ପାଇଁ ସୁଧାଂଶୁ ଅରାଜୀ ହେବାରୁ ନାକଟିଦେଉଳ ଥାନା କେସ୍ ନଂ୫୦/୨୧ ଧାରା ୪୯୩,୪୧୭, ୫୦୬ ଅନୁଯାୟୀ ଗିରଫ କରାଯାଇ କୋର୍ଟ ଚାଲାଣ କରାଯାଇଛି। ଏପଟେ ୨ ବର୍ଷର ଛୋଟ ପୁଅଟି ଅନାଥ ହୋଇଯାଇଥିବା ବେଳେ ସେ ପଟେ ନବବିବାହିତା ମହିଳାର ସ୍ୱାମୀ ଜେଲ ଯିବା ଘଟଣା ନାକଟିଦେଉଳ ଅଂଚଳରେ ଚାଂଚଲ୍ୟ ସୃଷ୍ଟି କରିଛି।

Read Moreଅପରାଧ, ଆଜିର ଖବର, ରାଜ୍ୟ ଖବର, ଜେଲ୍ ଗଲା ଯୁବକ, ଦ୍ୱିତୀୟ ବିବାହ, ପ୍ରତାରଣା, ପ୍ରେମିକା ପତ୍ନୀThe Samikhsya Odia

Leave a Reply

Your email address will not be published. Required fields are marked *